नखाई नलाई जम्मा गरेको बचत डुब्यो, प्रहरी कार्यालय धाउँदै पीडित

धनगढी । बिहानदेखि बेलुकासम्मको मेहनत, घरखर्च कटाएर गरेको बचत र भविष्य सुरक्षित बनाउने सपना । वर्षौँ लगाएर जम्मा गरेको त्यही पैसाका लागि धनगढीका हजारौँ बचतकर्ता भने प्रहरी कार्यालय धाउन बाध्य छन् । शिवशिखर सहकारी संस्था लिमिटेडमा उनीहरूको बचत रकम फसेको छ ।

आफ्नै पसिनाको कमाइ फिर्ता पाउनुपर्ने मागसहित तीन हजार तीन सयभन्दा बढी बचतकर्ताले प्रहरीमा उजुरी दिएका छन् । धनगढीकी रमिता रानाले नखाई नलाई दुःख गरेर जम्मा गरेको रकम फिर्ता नपाउँदा निराश हुनुपरेको गुनासो गरिन्।जीवनभरको मेहनतले जम्मा गरेको पैसा नै फसेपछि भविष्यका योजनासमेत प्रभावित भएको उनको भनाइ छ ।

शिवशिखर सहकारीका अर्का बचतकर्ता हरिप्रसाद जोशीले पनि जसोतसो गरेर करिब ११ लाख रुपैयाँ जम्मा गरेका थिए । तर, सहकारी बन्द भएपछि आफ्नो रकम फिर्ता पाउन उनले संघर्ष गर्नुपरेको छ । ठूलो रकम फस्दा परिवारको आर्थिक अवस्था र भविष्यको योजनामा असर परेको उनी बताउँछन् ।

शिवशिखर सहकारीबाट ठगिएको भन्दै कैलालीमा तीन हजार तीन सयभन्दा बढी बचतकर्ताले प्रहरीमा उजुरी दिएका छन् । यसैक्रममा बुधबार एक हजार चार सय जना बचतकर्तालाई जिल्ला प्रहरी कार्यालय कैलालीमा बोलाइएको थियो । उनीहरूलाई विचाराधीन मुद्दाको अनुसन्धान प्रक्रियाअन्तर्गत बकपत्र रुजुका लागि उपस्थित गराइएको प्रहरीले जनाएको छ ।

गौरीगंगा नगरपालिका–६, बनबेहडाबाट जिल्ला प्रहरी कार्यालय पुगेका टीकाराम शर्मा पनि आफ्नो बचत फिर्ता हुने आशामा प्रहरीकहाँ पुगेका हुन् । लामो समयदेखि रकम फिर्ताको प्रतीक्षामा रहेका बचतकर्ताहरूले आफ्नो गुनासो सुनाउने र न्याय पाउने आशामा प्रहरी कार्यालय धाउनुपरेको बताएका छन् ।

जिल्ला प्रहरी कार्यालय कैलालीका अनुसार अहिले सहकारीविरुद्ध नयाँ उजुरी दर्ता भइरहेको छैन । यसअघि दर्ता भएका उजुरी तथा विचाराधीन मुद्दाको अनुसन्धान प्रक्रियालाई अघि बढाउने क्रममा बचतकर्तालाई बकपत्र रुजुका लागि बोलाइएको हो ।

जिल्ला प्रहरी कार्यालय कैलालीका प्रहरी नायब उपरीक्षक योगेन्द्र तिमिल्सेनाका अनुसार बचतकर्तालाई अनुसन्धान प्रक्रियाअन्तर्गत बोलाइएको हो । प्रहरीले मुद्दाको प्रक्रिया अघि बढाइरहे पनि बचतकर्ताको रकम कहिले फिर्ता हुन्छ भन्ने प्रश्न भने अझै अनुत्तरित छ । वर्षौँको मेहनतले जम्मा गरेको रकम फिर्ता नपाउँदा बचतकर्ताहरू आर्थिक संकट र मानसिक तनावमा छन् ।

तपाइको प्रतिक्रिया
(Visited 12 times, 1 visits today)

epaper

ताजा समाचार

असोजमा भित्रियो कीर्तिमानी २ खर्ब ६७ अर्ब रुपैयाँ रेमिटेन्स