काठमाडौं । सशस्त्र प्रहरी बल नेपालले आगामी १ साउनदेखि आफ्ना सम्पूर्ण इकाइमा प्लास्टिकजन्य वस्तु निषेध गर्ने भएको छ । साथै प्लास्टिकजन्य केही वस्तुको प्रयोग क्रमशः कम गर्दैै लग्ने भएको छ ।

प्लास्टिकजन्य सामानको प्रयोग कम गर्दै लैजाने नीतिअनुरूप सशस्त्र प्रहरीले यो काम अघि बढाएको हो ।

मानवीय क्रियाकलापमा विशेषगरी हरितगृह ग्याँस उत्सर्जन र ‘नन डिग्राडेबल’ प्लास्टिकजन्य वस्तुुको बढ्दो प्रयोग र अव्यवस्थित विसर्जनले गर्दा जलवायु परिवर्तनमा विश्वव्यापी प्रभाव देखापरिरहेको विभिन्न वैज्ञानिक अध्ययन अनुसन्धानले प्रमाणित गरेको तथा मौसम परिवर्तनमा अतिवृष्टि, अनावृष्टि, खण्डवृष्टि, तापक्रम वृद्धि र हिमनदी, हिमताल तीव्र गतिमा पग्लिँदै गइरहेको सन्दर्भमा यस प्रकारको थालनी गरिएको सशस्त्र प्रहरी बलले जनाएको छ ।

सशस्त्र प्रहरी बलका सहायक प्रवक्ता एवं सूचना शाखा प्रमुअ डीएसपी शैलेन्द्र थापाका अनुसार, १ साउनबाट सशस्त्र प्रहरी बल नेपालले आफ्ना युनिटमा पोलिथिनका झोलाको प्रयोग, प्लास्टिकबाट निर्मित फूल तथा गमला खरिद, ‘डस्पोजेबल प्लास्टिक’का सामान प्रयोग, मेस, बाथरुम र ट्वाइलेटमा समेत प्लास्टिकका जग, मग, बाल्टी र बाटालगायतका सामान निषेध गर्ने निर्णय गरेको छ । यसका साथै सोही मितिबाट रासन स्टोरमा प्लास्टिकको झोला तथा बोरा, कार्यालयमा प्लास्टिकका पानी बोतल, क्यान्टिनमा प्लास्टिकमा प्याक गरिएका सामान बेचबिखन कार्य र फोहोर बाल्ने कार्यसमेत सशस्त्र प्रहरी बल नेपालको युनिटमा क्रमशः कम गर्दै लगिनेछ ।

त्यस्तै, वातावरण संरक्षणका लागि सशस्त्र प्रहरी बल नेपालले खाद्यान्य भण्डारणको लागि प्लास्टिकबाहेक टिन तथा काठको डिब्बा प्रयोग गर्ने, रासन सप्लायर्सलाई बिस्कुट तथा पाउरोटीलगायतका सामान कागजको प्याकेटमा आपूर्ति गर्न अनुरोध गर्न तथा फोहोरको वर्गीकरण गरी डस्टबिनको व्यवस्था मिलाउने र सोहीबमोजिम व्यवस्थापन गर्न स्थानीय तहसँग समन्वय गरी काम गर्ने योजना बनाइएको सशस्त्र प्रहरीले जनाएको छ ।

साथै आफ्ना कार्यालयमा पानीका लागि पुनः प्रयोग गर्न सकिने जारको प्रयोग गर्ने, युनिटमा हुने कार्यक्रममा कागज वा पातले बनेका नष्ट गर्न सकिने सामान प्रयोग, मेसमा स्टिल, सिसा वा तामाको जग, मगको प्रयोग गर्ने, मेस, ट्वाइलेट, बाथरुमलगायतमा सिल्भर तथा स्टिलको बाल्टी, बाटाको प्रयोग गरिने भएको छ । यसका साथै युनिट परिसरमा भएका खाली जग्गाको उपयुक्त स्थानमा मौसम र भूगोल सुहाउँदो अन्नबाली, तरकारी तथा फलपूmल खेती, प्रयोगमा नआएको कुनै पनि जमिन बाँझो नराख्ने र वातावरण संरक्षणसम्बन्धी भएका कार्यको स्तर सम्बन्धमा केन्द्रबाट निरीक्षणसमेत गरिने सशस्त्र प्रहरीले जनाएको छ ।

प्रत्येक नागरिकले स्वच्छ र स्वस्थ वातावरणमा बाँच्न पाउनुपर्छ भनी नेपालको संविधानमा भएको व्यवस्था तथा राष्ट्राध्यक्ष र सरकार प्रमुखबाट समेत विभिन्न अन्तर्राष्ट्रिय मञ्चमा वातावरण संरक्षणसम्बन्धी विशेषगरी ‘पेरिस एग्रिमेन्ट’ अनुसार व्यक्त प्रतिबद्धताका साथै मानव सुरक्षाको अवधारणामा समेत वातावरण सुरक्षा पर्ने भएकाले वातावरण संरक्षण र संवद्र्धन गर्न सहयोग पु¥याउने उद्देश्यले यी कार्यको थालनी गरिएको सशस्त्रले जनाएको छ ।