पुस १० देखि धनगढीमा तीनदिने खाना महोत्सव, स्थानीय परिकार प्रवर्द्धनमा जोड

धनगढी । सुदूरपश्चिमको मौलिक खानपान र परम्परागत परिकारको संरक्षण तथा प्रवर्द्धन गर्ने उद्देश्यले धनगढीमा तीनदिने ‘धनगढी खाना महोत्सव’ आयोजना हुने भएको छ । महोत्सव आगामी पुस १०, ११ र १२ गते धनगढीको जेन्जी मार्गमा सञ्चालन हुनेछ ।

धनगढी उपमहानगरपालिका र होटल व्यवसायी संघ कैलालीको सहकार्यमा आयोजना हुन लागेको महोत्सवका लागि दुवै पक्षबीच सम्झौता भएको छ । सम्झौताअनुसार उपमहानगरपालिकाले महोत्सव आयोजनाका लागि संघलाई १० लाख रुपैयाँ अनुदान उपलब्ध गराउनेछ ।

आयोजकका अनुसार महोत्सवमा प्रवेश निःशुल्क हुनेछ । महोत्सवमा स्थानीय तथा मौलिक खानाका परिकार सर्वसुलभ मूल्यमा उपलब्ध गराइनुका साथै हरेक दिन विभिन्न सांस्कृतिक कार्यक्रमसमेत प्रस्तुत गरिनेछन् ।

धनगढीका नगरप्रमुख गोपाल हमालले सुदूरपश्चिमका मौलिक तथा परम्परागत खानाका परिकारदेखि सामान्य रेस्टुरेन्ट र पाँचतारे होटलसम्मका विविध स्वाद र शैलीका परिकार एउटै स्थानमा उपलब्ध गराउने योजना रहेको बताए ।

उनले खाना महोत्सवलाई हरेक वर्ष आयोजना गर्ने योजना रहेको उल्लेख गर्दै उपभोक्ताले एउटै स्थानमा विभिन्न परिकार सहुलियत मूल्यमा स्वाद लिन पाउने बताए ।

महोत्सवका संयोजक केशव न्यौपानेले सुदूरपश्चिमको मौलिक खानपानको संरक्षण तथा प्रवर्द्धन, स्थानीय उत्पादनको बजारीकरण र संस्कृति तथा पर्यटन विकासमार्फत आर्थिक समृद्धिमा योगदान पुर्‍याउने उद्देश्यले महोत्सव आयोजना गर्न लागिएको बताए ।

होटल व्यवसायी संघ कैलालीका अध्यक्ष केशवराज पाण्डेले उपमहानगरपालिकासँगको सहकार्यमा पहिलोपटक तीनदिने खाना महोत्सव आयोजना गर्न लागिएको जानकारी दिए । उनले आगामी दिनमा वार्षिक क्यालेन्डर बनाएर महोत्सवलाई निरन्तरता दिने योजना रहेको बताए ।

महोत्सवमार्फत स्थानीय खानपानको संरक्षण र प्रचारप्रसारसँगै यस क्षेत्रका प्राकृतिक, धार्मिक तथा सांस्कृतिक पर्यटकीय सम्भावनालाई खानासँग जोडेर आन्तरिक पर्यटन प्रवर्द्धन गर्ने लक्ष्य राखिएको छ । साथै, स्थानीय कृषक तथा उत्पादकका कृषि उपज र खाद्य सामग्रीलाई बजारसँग जोड्ने उद्देश्यसमेत आयोजकको छ ।

महोत्सवबाट धनगढी तथा सुदूरपश्चिमका मौलिक खानाका परिकारको पहिचान स्थापित हुनुका साथै होटल तथा पर्यटन व्यवसायलाई थप चलायमान बनाउने अपेक्षा गरिएको छ । धनगढीका पर्यटकीय स्तरका होटलहरूको मेनुमा समेत सुदूरपश्चिमका मौलिक परिकार समावेश गर्ने वातावरण निर्माण गर्ने आयोजकको योजना छ ।

तपाइको प्रतिक्रिया
(Visited 7 times, 1 visits today)

epaper

ताजा समाचार

विश्व शान्तिमा नयाँ आशा कि शक्ति राष्ट्रको रणनीतिक स्वार्थ ?