सुन्दरहरैँचा (मोरङ) । “सुखमा पनि सँगै, दुःखमा पनि सँगै” भन्ने नेपाली समाजको परम्परागत दाम्पत्य संकल्पलाई चरितार्थ गर्दै मोरङको सुन्दरहरैँचामा एक अत्यन्तै मार्मिक र दुर्लभ घटना सार्वजनिक भएको छ। सुन्दरहरैँचा नगरपालिका वडा नम्बर ११, कर्जुनाका एक रैथाने दम्पतीको २४ घण्टाभित्रै पालैपालो निधन भएपछि सिंगो गाउँ शोकमा डुबेको छ।

दशकौँसम्म एउटै आँगन र एउटै चुल्हो चौको गरेर जीवनको उकालीओराली पार गरेका ६५ वर्षीय नन्दलाल कार्की र उनकी ५८ वर्षीया धर्मपत्नी बिमला कार्कीको जीवनयात्रा एकै दिन, लगभग सँगसँगै टुङ्गिएको हो।

के भएको थियो घटना ?
पारिवारिक स्रोतका अनुसार जेठ १४ गते नन्दलाल कार्की अचानक बिरामी परेपछि उनलाई हतार-हतार उपचारका लागि अस्पताल भर्ना गरिएको थियो। श्रीमान् अस्पताल भर्ना भएपछि चिन्तित बनेकी श्रीमती बिमला कार्की सोही दिन बेलुका सामान्य रूपमा खाना खाएर सुतेकी थिइन्।

तर, नियतिको खेल अर्कै भइदियो। जेठ १५ गते बिहान सबेरै ब्युँझाउन जाँदा बिमला आफ्नै ओछ्यानमा मृत अवस्थामा फेला परिन्। राति सुतेकै अवस्थामा उनको प्राण गइसकेको थियो।

“श्रीमतीको अचानक भएको मृत्युको खबर अस्पतालको शय्यामा छटपटाइरहेका श्रीमान् नन्दलालसम्म पुग्यो। जीवनसंगिनीको एक्कासि विछोडको त्यो असह्य पीडा र मानसिक आघातलाई उनले सहन सकेनन्,” एक स्थानीयले भावुक हुँदै भने। श्रीमतीको निधन भएको सोही दिन (जेठ १५ गते) राति करिब १० बजे उपचारकै क्रममा नन्दलाल कार्कीले पनि आखिरी सास फेरे।

गाउँभरि फैलियो स्तब्धता
एउटै घरका खम्बा जस्ता श्रीमान्-श्रीमतीको एकै दिन निधन भएपछि कर्जुना क्षेत्र मात्र नभई आसपासका आफन्त र चिनेजानेकाहरू समेत स्तब्ध बनेका छन्। जीवनभर सुख–दुःखमा सँगै यात्रा गरेको यो जोडिले संसारबाट बिदा लिँदा समेत एकअर्कालाई एक्लो नबनाएको भन्दै स्थानीयवासीले यसलाई एउटा दुर्लभ र आत्मिक सम्बन्धको उदाहरणका रूपमा लिएका छन्।

स्थानीयका अनुसार यो दम्पती गाउँमा निकै मिलनसार र सहयोगी भावनाको रूपमा परिचित थियो। उनीहरूको दुवै छोरा/छोरी र परिवार अहिले यो अप्रत्याशित बज्रपातले मर्माहत बनेका छन्।

लोहन्द्रा–लोहित गंगा घाटमा अन्त्येष्टि
लामो समयसम्म समाजमा सुखदुःख बाँडेका कार्की दम्पतीको अन्तिम बिदाइ पनि भावुक वातावरणमा गरिएको छ। मृत दम्पतीको पार्थिव शरीरलाई शनिबार दिउँसो २ बजे स्थानीय लोहन्द्रा–लोहित गंगा घाटमा सामूहिक रूपमा अन्त्येष्टि गरिने पारिवारिक स्रोतले जनाएको छ।

उनीहरूको दागबत्ती एकैसाथ दिइने तयारी भएसँगै घाटमा पुग्ने जोकोहीको आँखा रसाउने निश्चित छ। संसार छोडेर गए पनि उनीहरूको यो अगाध प्रेम र एउटै दिनको महाप्रस्थानको कथा सुन्दरहरैँचाबासीको मानसपटलमा लामो समयसम्म एउटा अमिट र मार्मिक इतिहास बनेर रहिरहनेछ।

सम्बन्धित समाचार

प्रजनन स्वास्थ्यमा कानुनी अड्चन हटाउन सरोकारवालाको जोड गछिया गोल्डकपको आय–व्यय सार्वजनिक, दोस्रो संस्करण अझ भव्य बनाइने अनशनरत रुबी खानले २३औँ दिनमा तोडिन् अनशन उदयपुर सिमेन्ट उद्योगका कर्मचारी तलब माग्दै आन्दोलित सङ्खुवासभाको मकालुमा पहिरोले २ सय बढी भेडा बगायो क्यानाडाको ह्युरोन तालमा नेपाली युवा सम्पर्कविहीन, खोजी जारी काकरभिट्टामा राष्ट्रिय ‘बी’ बुद्धिचाल च्याम्पियनसिप शुरु सुर्तीजन्य पदार्थ बिक्री नियन्त्रणका लागि तेह्रथुममा बजार अनुगमन