पोखरा । पर्यटनको राजधानी पोखरामा विदेशी पर्यटकले फागु पूर्णिमा अर्थात् होलीमा आपसमा रङ दलेर रमाइलो गरेका छन् । विभिन्न देशबाट पोखरा घुम्न आएका पर्यटकले नेपालीको रङहरूको यो पर्वमा निकै अभिरुचिपूर्वक पर्व मनाउँदै फरक महसुस गरेको बताए ।

पोखराको प्रमुख पर्यटकीय स्थल लेकसाइडमा जम्मा भएका विदेशी पर्यटकले पञ्चेबाजाको तालमा नाचगान गर्दै आपसमा रङ दलेको दृश्य क्यामरामा कैद गरिरहेको पाइन्थ्यो ।

आन्तरिक एवं बाह्य पर्यटन प्रवर्धन गर्ने उद्देश्यले रेस्टुरेन्ट एन्ड बार एसोसिएसन नेपाल (रेवान) पोखराले विगतमा झैं यसपालि पनि होली महोत्सव गरेको थियो । नेपाली चाडपर्व र संस्कृतिको संरक्षणसहित यसलाई पर्यटन प्रवर्धनमा जोड्न रेवानले १८ वर्षदेखि महोत्सवलाई निरन्तरता दिँदै आएको छ ।

महोत्सवमा नाचगान र रङले छ्यापाछ्याप गर्दै लेकसाइड परिक्रमा गर्दा विदेशी पर्यटक निकै रमाएका देखिन्थे । उनीहरूको अनुहार रङले रंगीचंगी बन्दा आपसमा चिन्नसमेत मुस्किल थियो ।

अम्बोटमा भेला भएर पर्यटकहरू संगीतको तालमा होली खेल्दै खहरेचोकसम्म पुगे । महोत्सवमा पर्यटनसम्बद्ध विभिन्न संघसंस्था, सरकारी कार्यालयका प्रतिनिधि, स्थानीय क्लब, आमा समूहको ठूलो सहभागिता थियो ।

होली मनाउन फेवाताल किनार जम्मा भएका मानिसलाई मनोरञ्जन प्रदान गर्न विभिन्न ठाउँमा कन्सर्टसमेत आयोजना गरिएको थियो ।

प्रचार नेपाल र स्पेक्स फोर्टिन आयोजनामा कोमागाने पार्कमा होली विशेष कार्यक्रम ‘होलिल्यान्ड’ मा युवाहरू खुबै रमाए । कन्सर्टमा उनीहरू विभिन्न गीतसंगीतमा साँझैसम्म रमाएका प्रचार नेपालका सञ्चालक आशिष पुरीले बताए ।

त्यस्तै, पाल्पाली समाज पोखरा, नेपाल पत्रकार महासंघ कास्कीलगायत विभिन्न संघसंस्थाले सामूहिक रूपमा फागु पूर्णिमा पर्व मनाए ।

पहाडी तथा हिमाली क्षेत्रमा बिहीबार फागु पूर्णिमा पर्व मनाइएकामा भोलिपल्ट शुक्रबार तराई क्षेत्रमा होली मनाइनेछ ।

सम्बन्धित समाचार

ई–पासपोर्ट छपाइ टेन्डरमा सहभागी कम्पनीको प्राविधिक मूल्यांकन सुरु नरभक्षी होइन बाघ श्रीमानले अर्कै विवाह गरेपछि आत्महत्या ओमन हुँदै खाडी मुलुकमा नेपाली महिलाको तस्करी उपप्रमुख डंगोलको अध्यक्षतामा फार्मेसी सञ्चालन व्यवस्थापन समितिको बैठक ‘स्कुल एट होम’ कार्यक्रमले बद्लिएको जीवन हिरासतमा भ्लोन दम्पत्तिको फेरिएको दैनिकी कहाँ गइन् रोशनी ? थकाली समुदायमा ‘तोरन ल्ह’ पर्वको रौनक चलचित्र चलाउन प्रोमोसनल गीतको लहर भूमिसम्बन्धी अध्यादेश ‘होल्ड’ पोखरामा अन्तर्राष्ट्रिय उडान नभएपछि व्यवसायीले बनाए चीन घुम्ने प्याकेज