काठमाडौं । वाणिज्य बैंकहरूमा अधिक तरलता भएसँगै वाणिज्य बैंकहरूले ब्याजदर घटाएका छन् । निक्षेपमा विकर्षण र कर्जामा आकर्षण हुने गरी बैंकहरूले ब्याजदर घटाएका हुन् ।
विगतमा एउटै किसिमको हुनेगरी ब्याजदर तोकिँदै आएकामा अहिले भने पहिलोपटक ब्याजदरको कार्टेलिङ तोड्दै प्रतिस्पर्धात्मक तवरले ब्याजदर तोकिएको छ ।
नेपाल बैंकर्स संघको गत बिहीबारको बैठकले आ–आफ्नै हिसाबले ब्याजदर निर्धारणका लागि बाटो खुला गर्ने निर्णय गरेसँगै असार महिनाको तुलनामा साउनमा केही बैंकले ब्याज बढाएका र केहीले घटाएका छन् ।
संघले ब्याजदरमा भएको भद्र सहमति हटाएपछि बैंकहरूले स्वतन्त्र रूपमा आज (सोमबार)देखि लागू हुनेगरी ब्याजदर तोकेका हुन् । असारसम्म सबै वाणिज्य बैंकको व्यक्तिगत मुद्दती निक्षेपमा समान ९ दशमलव ९९ प्रतिशत ब्याज रहेकामा अब भने फरक फरक भएको छ ।
साउनमा वाणिज्य बैंकहरू आफैंले ब्याजदर निर्धारण गरे पनि ‘ख’ वर्गका विकास बैंक र ‘ग’ वर्गका फाइनान्स कम्पनीहरूले छाता संगठनमार्फत ब्याजदर घटाएका छन् ।
धेरैजसो वाणिज्य बैंकहरूले आइतबार सूचना जारी गर्दै मुद्दती निक्षेपको ब्याजदर घटाएर सार्वजनिक गरेका छन् । केही बैंकहरूले भने असारकै ब्याजदरलाई निरन्तरता दिएका छन् ।
मुद्दती निक्षेपतर्फ सिद्धार्थ बैंक, राष्ट्रिय वाणिज्य बैंक, सानिमा बैंक, कुमारी बैंक, कृषि विकास बैंक र प्रभु बैंकले ब्याजदर घटाएका छन् ।
अधिक ब्याजदर कायम गर्नेे बैंकहरूमा क्रमशः एनएमबी, नबिल बैंक, प्राइम कमर्सियल बैंक, कुमारी बैंक, नेपाल एसबीआई बैंक रहेका छन् । त्यसैगरी हिमालयन, ग्लोबल आईएमई, लक्ष्मी सनराइज, सिटिजन्स बैंकले स्थिर राखेका छन् । सबैभन्दा कम ब्याजदर भने स्ट्यान्डर्ड चार्टर्ड बैंकको रहेको छ ।
सरकारको स्वामित्वमा रहेको कृषि विकास बैंकले बचत खातामा न्यूनतम ५ दशमलव ४० प्रतिशतदेखि अधिकतम ७ प्रतिशत ब्याजदर र मुद्दती निक्षेपमा संस्थागततर्फ ७ दशमलव ५१ प्रतिशत र व्यक्तिगततर्फ ९ दशमलव ५१ प्रतिशतसम्म ब्याजदर तोकेको छ । बैंकले रेमिट्यान्स बचत खातामा १० दशमलव ५१ प्रतिशत ब्याजदर प्रदान गर्ने जनाएको छ ।
यसैगरी, नेपाल बैंकले बचत खातामा न्यूनतम ४ दशमलव ८६ प्रतिशतदेखि अधिकतम ७ दशमलव ६६ प्रतिशत ब्याजदर र मुद्दती निक्षेपमा संस्थागततर्फ ६ दशमलव ९९ प्रतिशत र व्यक्तिगततर्फ ८ दशमलव ९९ प्रतिशतसम्म ब्याजदर तोकेको छ ।
यस्तै, राष्ट्रिय वाणिज्य बैंकले व्यक्तिगततर्फ अधिकतम ८ दशमलव ९९ प्रतिशत र संस्थागततर्फ ६ दशमलव ९९ प्रतिशत कायम गरेको सूचना प्रकाशित गरेको छ ।
पब्लिक कम्पनीका रूपमा रहेको सिद्धार्थ बैंकले व्यक्तिगततर्फ अधिकतम ९ दशमलव ५ प्रतिशत र संस्थागततर्फ ७ दशमलव ५ प्रतिशत ब्याजदर कायम गरेको छ ।
सानिमा बैंकले भने व्यक्तिगत ९ दशमलव ५२ प्रतिशत र संस्थागत ७ दशमलव ५२ प्रतिशत निर्धारण गरेको छ ।
कुमारी बैैंकले साउन महिनाका लागि निक्षेपमा न्यूनतम ७ दशमलव ५१ प्रतिशतदेखि १० दशमलव शून्य १ प्रतिशत नयाँ ब्याजदर प्रस्ताव गरेको छ ।
त्यस्तै, प्रभु बैंकले व्यक्तिगत निक्षेपमा ९दशमलव ५ प्रतिशत र संस्थागत ७ दशमलव ५ प्रतिशत कायम गरेको छ । नबिल, एनएमबी, नेपाल एसबीआई र हिमालयन बैंकले व्यक्तिगत मुद्दती निक्षेपमा अधिकत ९ दशमलव ९९ प्रतिशत र संस्थागतमा ७ दशमलव ९९ प्रतिशत दिने यसअघिको व्यवस्थालाई नै निरन्तरता दिएका छन् ।
यद्यपि एनएमबी, प्राइम कमर्सियल, एनआईसी एसिया र नबिल बैंकले ब्याजदर बढाएको हो कि भन्ने देखिएको छ । प्राइम कमर्सियल बैंकले सबै अवधिको मुद्दती निक्षेपमा १० दशमलव ९३ प्रतिशत ब्याज दिने जनाएको छ । यो चालू असार महिनाको ब्याजदरभन्दा शून्य दशमलव ९३ प्रतिशतले बढी हो । आर्थिक वर्षको चौथो त्रैमासमा बैंकको औसत आधारदर १० दशमलव ८४ प्रतिशत रहेको छ । बैंकले कर्जा लगानी यसै बेस रेटमा २ प्रतिशतदेखि ६ प्रतिशतसम्म प्रिमियम चार्ज गर्ने जनाएको छ ।
नबिल बैंकले निक्षेपमा १० दशमलव ४९ प्रतिशत ब्याजदर कायम गरेको छ । बैंकले न्यूनतम ८ दशमलव ४९ प्रतिशतदेखि अधिकतम १० दशमलव ४९ प्रतिशत ब्याजदर तोकेको छ ।
एनएमबी बैंकले भने १० वर्षमाथिको मुद्दती निक्षेपमा १० दशमलव ९८ प्रतिशत ब्याजदर दिने सूचना प्रकाशित गरेको छ । नबिल बैंकले पनि दुई वर्षभन्दा माथिको निक्षेपमा १० दशमलव ४९ प्रतिशत ब्याज दिने भएको छ ।
सबैभन्दा धेरै ब्याज घटाउनेमा स्ट्यान्डर्ड चार्टर्ड बैंक छ । सो बैंकले ब्याजदर १० प्रतिशतबाट घटाएर ८ दशमलव ९५ प्रतिशत कायम गरेको छ ।
वाणिज्य बैंकहरूको नयाँ ब्याजदरमध्ये सबैभन्दा बढी एनएमबी बैंकको रहेको देखिएको छ । बैंकले बचत खातामा न्यूनतम ५ दशमलव ९८ प्रतिशतदेखि अधिकतम ८ दशमलव ९८ प्रतिशत ब्याजदर र मुद्दती निक्षेपमा संस्थागततर्फ ७ दशमलव ९९ प्रतिशत र व्यक्तिगततर्फ ९ दशमलव ७५ प्रतिशतसम्म ब्याजदर तोकेको छ । बैंकले रेमिट्यान्स बचत खातामा १० दशमलव ९८ प्रतिशत ब्याजदर प्रदान गर्ने उल्लेख गरेको छ ।
हिमालयन बैंकले बचत खातामा न्यूनतम ५ दशमलव ४० प्रतिशतदेखि अधिकतम ७ दशमलव ४० प्रतिशत ब्याजदर र मुद्दती निक्षेपमा संस्थागततर्फ ७ दशमलव ९९ प्रतिशत र व्यक्तिगततर्फ ९ दशमलव ९९ प्रतिशतसम्म ब्याजदर तोकेको छ ।
ग्लोबल आईएमई बैंकले बचत खातामा न्यूनतम ५ प्रतिशतदेखि अधिकतम ७ प्रतिशत ब्याजदर तोक्नेछ । मुद्दती निक्षेपमा संस्थागततर्फ ७ दशमलव ९९ प्रतिशत, व्यक्तिगततर्फ ९ दशमलव ९९ प्रतिशत र रेमिट्यान्स खातामा भने ११ दशमलव ९९ प्रतिशत ब्याजदर तोकेको छ ।
लक्ष्मी सनराइज बैंकले बचत खातामा न्यूनतम ५ दशमलव ४० प्रतिशतदेखि अधिकतम ७ दशमलव ४० प्रतिशत ब्याजदर र मुद्दती निक्षेपमा संस्थागततर्फ ७ दशमलव ९९ प्रतिशत र व्यक्तिगततर्फ ९दशमलव ९९ प्रतिशतसम्म ब्याजदर तोकेको छ । सिटिजन्स बैंकले व्यक्तिगततर्फ ९ दशमलव ९९ र संस्थागततर्फ ७ दशमलव ९९ प्रतिशत ब्याजदर प्रदान गर्ने जनाएको छ ।
यसैंबीच, ‘ख’ वर्गका विकास बैंकहरूको पनि नयाँ ब्याजदर सार्वजनिक भएको छ । राष्ट्रियस्तरका विकास बैंकहरूले संस्थागत मुद्दती निक्षेपमा अधिकतममा ८ दशमलव १० प्रतिशत र व्यक्तिगत मुद्दती निक्षेपमा १० दशमलव १० प्रतिशत कायम गरेका छन् । असारमा राष्ट्रियस्तरका विकास बैंकहरूले संस्थागत मुद्दती निक्षेपमा अधिकतममा ८ दशमलव ६० प्रतिशत र व्यक्तिगत मुद्दती निक्षेपमा १० दशमलव ६० प्रतिशत ब्याज दिएका थिए ।
क्षेत्रीयस्तरका विकास बैंकले असारमा संस्थागत मुद्दती निक्षेपमा अधिकतममा ८ दशमलव ८५ प्रतिशत र व्यक्तिगत मुद्दती निक्षेपमा १० दशमलव ८५ प्रतिशत ब्याज दिइरहेका छन् । अब साउनमा घटाएर क्रमशः ८ दशमलव ३५ प्रतिशत र १० दशमलव ६५ प्रतिशत दिने भएका छन् ।
यसैगरी, फाइनान्सहरूले साउनदेखि लागू हुने गरी मुद्दती निक्षेपको ब्याजदर घटाएका छन् । जसअनुसार फाइनान्सहरूले मुद्दती निक्षेपमा अधिकतममा संस्थागततर्फ ८ दशमलव ७० प्रतिशत र व्यक्तिगततर्फ १० दशमलव ७० प्रतिशत कायम गरेका छन् ।
