काठमाडौं । पाँच वर्षभन्दा माथिका बालबालिकालाई लगाउन मिल्ने कोरोनाविरुद्धको खोप आउने भएको छ । कोभ्याक्स सुविधाअन्र्तगत अमेरिका सरकारले ८४ लाख मात्रा खोप फाइजर अनुदानमा दिन लागेको हो ।
स्वास्थ्य सेवा विभाग खोप शाखा प्रमुख डा. सुरेन्द्र चौरसियाले पाँच वर्षदेखि १५ वर्ष उमेर समूहका बालबालिकालाई लगाउन मिल्ने खोप आउन लागेको जानकारी दिए । उनले जुन महिनाभित्र खोप आउने बताए ।
डा. चौरसियाले ०.५ एमएल पेडियाट्रिक डोज निःशुल्क उपलव्ध गराउने निश्चित भइसकेको बताए । सरकाले यसअघि ११ वर्षसम्मका बालबालिकालाई ८४ लाख मात्रा खोप खरिद गर्ने प्रक्रिया अन्तिम चरणमा पुर्याएको थियो । सो खोप खरिदका लागि छ अर्बभन्दा बढी खर्च लाग्दथ्यो ।
बालबालिकाहरुलाई खोप खरीद गरेरै भए पनि लगाउने योजनामा सरकार लागि सकेको थियो तर अमेरिकी सरकारले नेपाली बालबालिकालाई निशुल्क खोप उपलव्ध गराउने भएपछि खरिद प्रक्रिया स्थगित गरिएको चौरसियाको भनाइ छ ।
उनले नेपालको भण्डारण क्षमता मिलाएर चरणवद्ध रुपमा पेडियाट्रिक डोज खोप प्राप्त हुने बताए । चौरसियाले असारभित्रै बालबालिकालाई पहिलो मात्रा खोप लगाउन सुरु गर्ने जानकारी दिए । फाइजर खोप माइनस ७० डिग्री तापक्रममा भण्डारण गर्नुपर्ने हुन्छ । हाल नेपालमा १५-२० लाख डोज मात्रै भण्डारण क्षमता छ ।
