काठमाडौं । नेपालले पहिलोपटक बंगलादेशमा विद्युत् निर्यात गरेको छ । भारतबाट स्वीकृति आएकाले शुक्रबार बंगलादेशलाई विद्युत् बिक्री गरिएको नेपाल विद्युत् प्राधिकरणका प्रवक्ता चन्दनकुमार घोषले जानकारी दिए ।

प्राधिकरणले यस वर्षका लागि शुक्रबार राति १२ बजेसम्म मात्रै विद्युत् बेचेको छ । शुक्रबार करिब ११ घण्टा मात्रै विद्युत् बिक्री गर्दा प्राधिकरणले ३८ लाख ३२ हजार ४ सय रुपैयाँ आम्दानी गरेको छ । भारतलाई भारतीय मूल्यमा बिक्री गर्दै आएको प्राधिकरणले पहिलोपटक डलरमा विद्युत् निर्यात गरेको हो ।

६ वर्षको गृहकार्यपछि गत १७ असोजमा नेपाल, बंगलादेश र भारतबीच ४० मेगावाट विद्युत् किनबेचको सम्झौता भएको थियो । नेपालबाट बंगलादेशमा विद्युत् निर्यात गर्न भारतको प्रसारणलाइन प्रयोग गर्नुपर्ने भएकाले त्रिपक्षीय सम्झौता भएको थियो । नेपाल, भारत र बंगलादेशबीच ४० मेगावाट विद्युत् बिक्री गर्ने सम्झौता भए पनि भारतको स्वीकृति नआएकाले ढिलाइ भएको थियो । सोही कारण सम्झौता भएको महिना दिनसम्म नेपालले बंगलादेशलाई विद्युत् बिक्री गर्न सकेको थिएन ।

प्राधिकरणले हरेक वर्ष १५ जुनदेखि १५ नोभेम्बरसम्म बंगलादेशलाई विद्युत् बिक्री गर्ने सम्झौतामा उल्लेख छ । सम्झौता हुँदा यसै वर्ष एक दिन भए पनि विद्युत् बिक्री गर्ने प्राधिकरणका कार्यकारी निर्देशक कुलमान घिसिङले बताएका थिए । सोहीनुसार प्राधिकरणले विद्युत् बिक्री गरेको हो ।

प्राधिकरणले सम्झौतानुसार प्रतियुनिट ६.४० अमेरिकी सेन्टका दरले विद्युत् बेचेको हो । प्राधिकरणले ढल्केबर–मुजफ्फरपुर ४०० केभी प्रसारण लाइनबाट विद्युत् दिएको छ । मुजफ्फरपुरबाट भारतको प्रसारण लाइनमार्फत बहरामपुर–भेरमारा ४०० केभी प्रसारण लाइन हुँदै विद्युत् बंगलादेश पु¥याइएको थियो ।

बंगलादेश निर्यात हुने विद्युत्को मिटर मुजफ्फरपुरमा रहेको छ । त्यही मिटरका आधारमा प्राधिकरणले पैसा पाउनेछ ।

ढल्केबरबाट मुजफ्फरपुरसम्मको प्रसारण लाइनको प्राविधिक चुहावट प्राधिकरणले बेहोर्नेछ । प्राधिकरणका अनुसार ढल्केबरबाट मुजफ्फरपुरसम्म ३ प्रतिशत चुहावट हुन्छ ।

प्राधिकरणले भारतीय अनुदानमा निर्माण भएको तथा आफ्नो स्वामित्वमा रहेको २५ मेगावाटको त्रिशूली र २२ मेगावाटको चिलिमे जलविद्युत् आयोजनाबाट उत्पादित विद्युत् बंगलादेश निर्यात गरेको हो । बंगलादेशलाई विद्युत् बेच्दा मुलुकलाई प्रतिमहिना करिब ३३ करोड रुपैयाँ आम्दानी हुनेछ । कुल पाँच महिनामा १ लाख ४४ हजार मेगावाट विद्युत् निर्यात हुने प्राधिकरणले जनाएको छ । प्रतियुनिट ६.४० अमेरिकी सेन्टका दरले पाँच महिनामा ९२ लाख १६ हजार अमेरिकी डलर आम्दानी हुने प्राधिकरणले जनाएको छ ।

नेपालले डलरमा विद्युत् बिक्री गरेको पहिलोपटक हो । यसअघि भारतसँग भारतीय रुपैयाँ (भारु)मै कारोबार हुँदै आएको छ । बंगलादेशलाई विद्युत् बिक्री हुँदा मुलुकलाई प्रतिमहिना ३३ करोड रुपैयाँ आम्दानी हुने प्रक्षेपण प्राधिकरणको छ ।

२५ साउन २०७५ सालमा तत्कालीन ऊर्जामन्त्री वर्षमान पुन र बंगलादेशका तत्कालीन विद्युत्, ऊर्जा तथा खनिज स्रोत राज्यमन्त्री नसरुल हमिदले प्रारम्भिक समझदारीमा हस्ताक्षर गरेका थिए ।

भारतका राजदूत नवीन श्रीवास्तवको उपस्थितिबीच भएको त्रिदेशीय सम्झौता नेपालको विद्युत् निर्यातका क्षेत्रमा कोसेढुंगा साबित भएको छ । अबदेखि सहज रूपमा बंगलादेश र भारतमा विद्युत् निर्यात गर्न सकिने भएको छ ।

गत वर्षको २० मंसिरमा बंगलादेशका तत्कालीन अर्थमन्त्री मुस्तफा कमलको नेतृत्वको मन्त्रिपरिषद्को आर्थिक मामिला समितिले ४० मेगावाट विद्युत् आयात गर्ने बंगलादेश पावर डेभलपमेन्ट बोर्डको प्रस्ताव स्वीकृत गरेको थियो । प्राधिकरण र बीपीडीबीबीच विद्युत्को दरमा गत फागुनको अन्तिममा सहमति भएको थियो । गत १३ साउनमा काठमाडौंमा त्रिपक्षीय सम्झौताको तयारी भएको थियो ।

सन् २०१८ देखि नेपाल र बंगलादेशले ऊर्जा क्षेत्र सहयोगसम्बन्धी समझदारीपत्रमा हस्ताक्षर गरेपछि संयुक्त कार्यदल र संयुक्त सञ्चालन समितिको ६ वटा सफल बैठक तथा त्यसपछिको निरन्तर प्रयासपछि सम्झौता भएको हो ।

बीपीडीबीले नेपालमा उत्पादित ४० मेगावाट विद्युत् खरिद–बिक्रीका लागि सम्झौता गर्न प्राधिकरणलाई पत्राचार गरेको थियो । बीपीडीबीले वर्षायामको ६ महिना ४० मेगावाट विद्युत् बिक्रीका लागि प्राधिकरणले पेस गरेको बोलपत्र सम्बन्धित निकायबाट स्वीकृत भएको जानकारी गराउँदै विद्युत् बिक्री सम्झौताका लागि पत्राचार गरेको थियो ।

सम्बन्धित समाचार

फस्टायो तिहारसँगै पाल्पाली ढाकाको व्यापार रारा ताल्चा विमानस्थलको ट्र्मिनल भवन निर्माणमा ढिलाई पोखरामा १२ देशका ६० पर्यटकलाई भाइटिका तिहारमा ५० करोड रुपैयाँबराबरको फूलको व्यापार नेपाल एयरलाइन्सका अन्तर्राष्ट्रिय गन्तव्यको उडान तालिका परिवर्तन नेपालमा इन्टरनेट प्रयोगकर्ता कुल जनसंख्याभन्दा बढी अधिक तरलताको मारमा बैंक, व्यवस्थापनमा सकस विद्युत् काटिएका उद्योगमा लाइन जोड्दै कीर्तिपुरको मेयरमा कांग्रेसवाट ११ जना सिफारिस ह्यारिसलाई पराजित गर्दै ह्वाइटहाउसमा ट्रम्पको पुनरागमन पूर्वमन्त्री लिलावल्लभ अधिकारीलाई थप अनुसन्धानका लागि काठमाडौं ल्याइयो एमाले इलाम अधिवेशनः गुटबाट नेतृत्व लिने होडबाजी पेचिलो बन्द